Det er pinleg å høyra Djupedals statssekretær Lisbeth Rugtvedt forsvara innsatsen til departementet i saka om nynorske læremiddel. Det er pinleg fordi departementet gjer absolutt ingen ting, og står og ser på at nynorske elevar systematisk vert diskriminert i skulen.
På 1970-talet fekk Norsk Målungdom og mållaget gjennom fleire års protestar vedteke ei lov som står fast at læremiddel som skal brukast i den norske skulen, skal liggja føre til same tid og pris på båe målføre. Kvar gong det kjem nye reformer og bøker i skulen, vert lova broten. Det er ikkje akseptabelt.
I Her og Nå (NRK) i dag var statssekretær Rugtvedt i Kunnskapsdepartementet innkalla for å svara for kva departementet har gjort. Svaret er ingen ting. Rugtvedt og Djupedal skyv ansvaret nedover i systemet, og viser til at det er fylkeskommunane som skal sikra at det ikkje vert tatt i bruk bøker som ikkje finst på begge målføre.
Teknisk sett har departementet her rett. Men årsaka til at det alltid er problem med dei nynorske lærebøkene, finn ein jamvel i departementet. For det fyrste har Djupedal (og Clemet) lagt opp til ei særs hastig innføring av Kunnskapsløftet. Det tyder at tida mellom der læreplanen i faget er ferdig, og der læreboka skal vera klar til bruk i skulen, er kort. Og då er det nynorskutgåva som vert nedprioritert. Tempoet i innføringa er ikkje akseptabel for å sikra at alle omsyn vert ivaretekne i prosessen, og burde vore lågare.
For det andre burde departementet, gjennom Utdanningsdirektoratet, instruert Fylkesmannen i kvart fylke til å påtala og straffa skular som tek i bruk læremiddel som ikkje oppfyller lovkrava. Om Djupedal og departementet hadde tatt nynorskelevane alvorleg, hadde dei brukt langt kraftigare straff for lovbrytarane, og brukt langt meir tid på å pressa forlaga som ikkje klarer å levera til rett tid.
Streiken til Norsk Målungdom er ein streik i rett tid og med sjølvsagte krav. Vi stør difor streiken, og krev at forlaga, departementet og fylkeskommunane respekterer lova og gjev nynorskelevane læremiddel på deira eiga skriftmål.